“MADAD"in heyəti 328 saylı tam orta məktəbdə açıq dərsdə iştirak etdi

"MADAD" təşkilatının nümayəndələri “İbtidai təhsildə mentorluq xidməti” layihəsi çərçivəsində Bakı şəhəri Nizami rayonunda yerləşən 328 saylı tam orta məktəbdə açıq dərslərdə iştirak etdilər. Açıq dərsdə iştirakın məqsədi "MADAD"in təlimçiləri tərəfindən təlimləndirilmiş ibtidai sinif müəllimlərinin dərs keçmə metodikasını müşahidə etmək və qiymətləndirməkdən ibarət olmuşdur.

Mentor İlahə Rüstəmovanın iştirak etdiyi açıq dərsdə 2-ci sinif müəlliməsi olan Gülgün Azayeva vurma ilə bölmənin qarşılıqlı əlaqəsi mövzusunda dərs keçirdi. Dərs “Mauqli” cizgi filminin personajlarının təsviri ilə verilmiş slaydlarla başladı. Mauqlinin dostları arasında meyvələrin necə bölünməsinə dair suallar şagirdlər tərəfindən maraqla qarşılandı. Bölgünün düzgünlüyünü yoxlamaq üsulları ətrafında müzakirə təşkil edildi. Şagirdlər 5 qrupa bölünərək müəllimin verdiyi tapşırıqlar ətrafında tədqiqat apardılar. Tədqiqatın nəticələrini hər qrupdan bir şagird təqdim etdi. Onlar verilmiş misalların həlli üsullarını izah etdilər, tapşırıq üzrə araşdırdıqları heyvan və ya quşlar haqqında maraqlı məlumatlar verdilər. Təqdimatdan sonra qrup təqdimatları qiymətləndirildi. Suallar əsasında dərsdə əldə olunan biliklər bir daha möhkəmləndirildi. “Kim daha tez və daha düzgün” oyunu ilə dərs davam etdi. Qruplar lövhədə təqdim olunan misalları həll edərək oyunu növbə ilə öz yoldaşlarına ötürməklə başa vurdular. Sonda hər qrupun misalları müəllimin köməyi ilə yoxlanıldı, qalib qruplar alqışlandı. Dərsin sonunda müəllim şagirdlərə tapşırıqlar verdi. Dərsdə fəal olan şagirdlər qiymətləndirildi.

Növbəti açıq dərs mentor Şəymən Əliyevanın iştirakı ilə müəllim Səadət Məmmədovanın sinifində keçirildi. “Lalə və Məryəm” mövzusu ətrafında keçirilmiş dərs “Meşəyə insan gəlir” cizgi filmi ilə başladı. Meşədəki heyvanların filmin əvvəlində insana münasibəti ilə filmin sonundakı münasibəti arasındakı fərqi müəyyən etmək üçün müxtəlif suallarla şagirdlərə müraciət edildi. Müəllim şagirdlərin yuxuları haqqında fikirlərini öyrəndikdən sonra dərsin adını elan etdi. Yeni qrammatik qayda ilə tanış olan şagirdlərə işçi vərəqələri paylanmaqla tədqiqat aparmaları tapşırıldı. Tədqiqata başlamamışdan öncə tapşırıqlar müəllim tərəfindən izah olundu. Şagirdlər verilmiş vaxt ərzində öz qruplarında tapşırıqları yerinə yetirdilər. Qruplar təqdimat etdilər. Çəkdikləri ev heyvanı haqqında məlumat verdilər, qrammatik tapşırığı oxudular, krossvordun nəticəsini elan etdilər. Qrupların təqdimatından sonra ümumi işlərin müzakirəsi təşkil edildi. Qrup işləri qiymətləndirildi. Dərsin sonunda qruplar arası oyun keçirildi. Oyunda hər qrup bir heyvanın adını deyir, heyvan adının son hərfi ilə başlayan yeni heyvan adına uyğun növbəti qrup oyunu davam etdirir. Zəncir qırılana kimi bu qayda ilə oyun davam etdirildi. Dərsdə fərqlənən şagirdlər müəllim tərəfindən əvvəlcədən müəyyən edilmiş meyarlarla qiymətləndirildi.

Açıq dərslər müəllimlərin tədris prosesində yeni yanaşmalar, intekaktiv öyrətmə metodikasını tətbiq etdiklərini göstərdi. İbtidai sinif şagirdlərinə vurma və bölmə əməllərinin mahiyyətinin canlı formatda izah olunması, insanların canlı təbiətə qayğısının, heyvanat aləmi haqqında biliklərin catdırılması üçün oyun platformasının yaradılması monitorinq aparan mütəxəssislər tərəfindən olduqca müsbət qiymətləndirildi.

Ümumilikdə, qiymətləndirilmə "MADAD"in təlimlərinin müəllimlərin dərs metodikasına, müasir İKT resurslarının tədris prosesində istifadə olunmasına, dərslərin keyfiyyətinin yüksəldilməsinə müsbət təsir etdiyini göstərdi.