Azərbaycanlı şagirdlər ABŞ-da keçiriləcək beynəlxalq elm və mühəndislik müsabiqəsində iştirak edəcəklər

Azərbaycan Respublikası Təhsil Nazirliyi, Gənclər və İdman Nazirliyi və "Mədəd Azərbaycan" təşkilatının birgə əməkdaşlığı ilə təşkil olunan "Sabahın alimləri" III Respublika müsabiqəsinin nəticəsi olaraq Ayaz Abuzərov, Nərgiz Allahverdiyeva, Cəmil İmranov, Cəmil Muradov, Lalə Cümşüdlü, Mədinə Mürsəqulova təqdim etdikləri layihələrə görə qalib elan olunaraq, may ayında ölkəmizi ABŞ-da keçiriləcək İntel İSEF beynəlxalq elm və mühəndislik müsabiqəsində təmsil etmək hüququ qazanmışlar.

Qaliblər fevralın 13 – 15-də "Kempinski Badamdar" otelində "Sabahın alimləri" III Respublika Müsabiqəsi zamanı seçilmişlər. Xatırladaq ki, müsabiqənin əsas məqsədi yuxarı sinif şagirdlərinə öz elmi nailiyyətlərini nümayiş etdirmək imkanı vermək və onların arasından ABŞ-da hər il keçirilən Intel ISEF müsabiqəsində iştirak edəcək namizədləri müəyyənləşdirməkdir. Bu müsabiqə dünyada şagirdlər arasında keçirilən ən böyük və ən nüfuzlu beynəlxalq müsabiqəyə seçim turudur.

Müsabiqənin açılış mərasimində Təhsil naziri Mikayıl Cabbarov, Azərbaycan Təhsil İşçiləri Azad Həmkarlar İttifaqı Respublika Komitəsinin sədri Səttar Mehbalıyev, Gənclər və İdman nazirinin müavini İntiqam Babayev, İntel korporasiyasının MDB ölkələri üzrə meneceri Tatyana Nanayeva, "Mədəd Azərbaycan" təşkilatının icraçı direktoru Vüsal Xanlarov, ali təhsil müəssisələrinin rəhbərləri, ümumtəhsil məktəblərinin direktorları, müəllimlər və şagirdlər iştirak etmişlər.

Müsabiqə müddətində layihələrlə bağlı problemləri aradan qaldırmaq, müsabiqəyə hazırlıq mərhələsini düzgün planlaşdırmaq, əsas nöqsanları və çətinlikləri araşdırıb onlarla bağlı məsləhətlər vermək məqsədilə elmi rəhbərlər üçün "Təhsil Akademiyası" təşkil olunmuşdur. Çıxış edənlər öz təcrübələrinə istinad edərək elmi rəhbərlərin suallarını cavablandırmış, onlara dəstək olacaq təkliflər səsləndirmiş və gələcək fəaliyyətlərinə kömək olacaq məlumatlarla bölüşmüşlər.

"Sabahın alimləri" III Respublika Müsabiqəsində Bakı, Sumqayıt və Naxçıvanda yerləşən ümumtəhsil məktəblərinin IX-XI sinif şagirdləri iştirak etmiş və 108 şagird tərəfindən 8 kateqoriya üzrə (riyaziyyat, fizika, kimya, biologiya, tibb və sağlamlıq, ekologiya, mühəndislik, kompüter elmləri) 65 elmi layihə təqdim olunmuşdur.

Üç gün davam edən müsabiqədə layihələrin qiymətləndirilməsi və ölkəmizin görkəmli alimləri ilə şagirdlərin görüşü keçirilmişdir. Müsabiqənin qaliblərinə təşkilatçılar tərəfindən təsis edilmiş pul mükafatı, diplom və medallar təqdim olunmuşdur.

11-16 may tarixində ABŞ-ın Los Angeles şəhərində keçiriləcək Intel ISEF müsabiqəsində iştirak edəcək finalçılar 16 fevralda Mədəd təşkilatı tərəfindən dəvət olunmuş Evgeni Zakablukovskinin "Təqdimat bacarıqları" təlimində iştirak etmişlər. Intel korporasiyasının İctimaiyyətlə Əlaqələr üzrə mütəxəssisi Evgeni milli müsabiqənin qaliblərinə beynəlxalq müsabiqədə uğurla iştirak etmək üçün vacib olan əsas təqdimat bacarıqları, onları inkişaf etdirməyin yollarını izah etmiş və praktiki olaraq nümayiş etdirmək, öz səhvlərini izləmək üçün şərait yaratmışdır. Yekunda öz çıxışlarını izləyən şagirdlər bu məşğələdən sonra müsabiqədə iştirakları üçün nələri daha da təkmilləşdirməli olduqlarını anladıqlarını və təlimin onlar üçün olduqca faydalı olduğunu qeyd etmişlər.

Fotoalbom-->

Paylaşın: